Datorren asteartean, hilak 10, Gorka Torrek euskararen erabilera normalizatua aldarrikatzeko egin dituen ekintzen aldeko bilera solidarioa egingo da Baionan.
Duela urte asko (joan den mendeko laurogeiko hamarkadaren amaiera aldera) Eskola eta Kultura Minorizatuak izeneko irakasgaia eskaini genuen Paris VIIIko unibertsitatean (Saint Denis), eta han Euskal Herriko Unibertsitateko hainbat irakasle (tartean Txillardegi bera) joan ginen eskolak ematera.
Saint Denisko orduko udalerri komunistak 1968ko Parisko maiatzean Vincennesen sortutako proposamen unibertsitarioa hartu zuen bere baitan garai hartako gobernu frantsesak aldarrikapenaren aukera bere sustraiak ere txikitu zituelako.
Lekualdatze horretatik sortu zen Sain Denisko unibertsitatean, adibidez, azterketak debekatuta zeudela erabakitzea, eta, ondorioz, ebaluatzeko moduak irakasleen eta ikasleen artean adostu ohi ziren.
Edonola ere, hango gure klaseak emateko genuen arazorik handiena frantsesezko materialik eza zen. Hori zela eta, euskarak irakaskuntzan zuen egoera azaltzeko irudiak eta edukiak bilatzen nituen etengabe Frantziako telebistetan. Haietako batean, behin, haur txiki batek argi eta garbi, eta frantsesez, haur euskaldunek beren hizkuntzan ikasteko zituzten zailtasunak azaltzen zituen eta unibertsitateko eskolak emateko erabili nuen dokumentu hura.
Urteak pasa eta 1992an, berriz, Seaskak lehen aldiz frantses estatuko «terminal» azterketei ikastalde oso bat aurkeztea erabaki zuen ikaskideak unibertsitatera joan zitezen, eta, hori ustekabea, han aurkitu nuen Gorka Torre, aipatuko dokumentuko haurra filosofiako ikasle gazte bihurturik jada, bere ikaskideekin batera goi mailako irakaskuntzara igarotzeko prestatzen ari zena.
Gaur da eguna, ordea, zeinean Gorka epaituko duten txikitatik aldarrikatu duena defendatzeagatik, euskaraz bizitzeko duen beharraren alde publikoki agertzeagatik hain zuzen ere, eta irakurri berri dut bere garai hartako ikaskideek, nire ikasleak izan zirenak, elkartasuna adierazi nahi izan diotela.
Horrenbestez, nik ere aukera horretaz profitatu behar dudala uste dut neure burua jendaurrean bere aldeko jarrera erakusteko, eta, azalarazteko halaber, Gorkak eta bere ikaskideek gaur egun defendatzen dutena modu solidarioan defendatzen badute eta egiten duten bezala egiten badute, orduan beren irakasle izan ginenok irakatsi geniolako dela, nik behintzat halakoxeak irakatsi nizkien.
Beraz, haren ikaskideek adierazi bezala, Gorkaren borroka ezagutaraztea nahi dut, eta hemendik dei egiten dut bere aldarrikapenekin bat egitera.
Izan ere, horretan behintzat, bere orduko gelako ikaskide bat gehiago besterik ez naiz sentitzen.
Autorearen baimenarekin ekarria,
jatorriz Naiz iritzi blogean argitaratua,
2024ko irailak 5.
