Prentsa-oharra
LAPa eztabaidagai Balmasedan
Euskal Herria Bizirik eta Enkarterrin Makroeolikorik EZ herri plataformek joan den abenduan Eusko Jaurlaritzak behin-behinean onartutako Energia Berriztagarrien Lurraldearen Arloko Planaren (LAP) ondorioei buruzko bilera-eztabaida antolatu dute Balmasedan. Ekitaldi berean, Bizkaian aurkeztuko da martxoaren 22an Gasteizen egingo den “Euskal Herria ez dago salgai” manifestazio nazionalaren deialdia.
Topaketa Balmasedako Kultur Etxean izango da martxoaren 6an, eta bertan izango dira Roberto Ruiz de Arkaute, Araba Bizirik plataformako eta Euskal Herria Bizirik talde juridikoko kidea, eta Valentín Ibarra, Balmasedako geologoa, udalerri horri eragiten dioten proiektu eolikoei buruzko alegazioak egiten parte hartu duena; esate baterako, Udalak Balmaseda I (Pandozales) eta II (La Garbea) poligonoak ezartzeko lehia-prozesuei buruz aurkeztutakoak, 2023ko uztailean ireki eta erabaki formalik ebatzi gabe dutenak.
Martxoaren 22an Gasteizen manifestazio nazionala egingo dugu Euskal Herria Ez Dago Salgai lelopean, Euskal Herria Bizirik sareak eta herrialde osoko plataformek deituta
Martxoaren 6ko topaketaren helburua Energia Berriztagarrien Plan berriari buruzko informazioa ematea eta eztabaida publikoa sortzea da, baita plan horren irismen juridikoa eta Euskadiko lurraldeetan, bereziki Enkarterrin, izango dituen ondorioak ezagutzea ere. Topaketa hau Euskal Herria Bizirik-ek eta herrialde osoko plataformek deituta Euskal Herria Ez Dago Salgai lelopean martxoaren 22an Gasteizen egingo den manifestazio nazionala zabaltzeko kanpainaren parte da. Mobilizazio horren helburua da herritar gehienek adieratzea Energia Berriztagarrien Lurralde Plana eta megaproiektu energetikoak zein lurraldea mehatxatzen duten beste batzuk gaitzesten dituztela. Balmasedako LAPari buruzko hitzaldia izango da deialdi hau Bizkaian aurkezteko aukera. Helburu bereko beste ekitaldi publiko batzuk ere egiten ari dira Euskal Herriko beste leku batzuetan.
Herritarrek irmo erantzun diote plan horri eta 4.000 alegazio baino gehiago aurkeztu dituzte; horietatik 600 baino gehiago Enkarterrin
LAPak energia berriztagarrien industriarako “hautatutako kokapen-eremuak” ezartzen ditu, eta horien instalazioa erraztu nahi du, administrazio-prozesuak azkartuz eta indarrean dagoen lurralde-legeriari eta ingurumena babesteko legeriari gainjarriz. Herritarrek irmo erantzun diote plan horri, eta 4.000 alegazio baino gehiago aurkeztu dituzte; horietatik 600 baino gehiago Enkarterrin jasoak hain zuzen ere. Antolatzaileek salatu dutenez, LAP honek industria “berriztagarriarentzako sakrifizio-eremuak” sortzeko mehatxua egiten du, Enkarterri horietako bat izanik. Prozesua gardentasun eta parte- hartze faltarekin eraman dela ere adierazi dute: horren erakusgarri dira aurkeztutako alegazioei emandako erantzunak, azalekoak izan direnak, kasurik egin gabe planteatutako gai kritikoei. Era berean, salatu dute LAParen behin betiko dokumentuak modu arbitrarioan aldatzen duela hainbat eremuren gaitasun eolikoa, sinesgarritasun eskaseko haizearen neurketak alde batera utzita, ekoizpen elektrikoko poligonoen ezarpena artifizialki errazteko.
Arrazoi horiengatik, Euskal Herria Bizirik eta Enkarterrin Makroeolikorik EZ elkarteek martxoaren 6an Balmasedako Kultur Etxera joateko gonbita luzatzen diete herritarrei, LAPari eta horren ondorioei buruz informatzeko eta kritikoki eztabaidatzeko, baita lurraldearen defentsaren izenean martxoaren 22an Gasteizen indartsu mobilizatzeko ere.
Harremanetarako:
enkarterrinparkeeolikorikez@gmail.com
654 443 307 (Javi)
Ze ordutan?
Martxoak 6, osteguna
Balmasedako Kultur Etxean
“Martxoaren 6ko topaketaren helburua Energia Berriztagarrien Plan berriari buruzko informazioa ematea eta eztabaida publikoa sortzea da, baita plan horren irismen juridikoa eta Euskadiko lurraldeetan, bereziki Enkarterrin, izango dituen ondorioak ezagutzea ere.”
“Euskal Herria Bizirik eta Enkarterrin Makroeolikorik EZ elkarteek martxoaren 6an Balmasedako Kultur Etxera joateko gonbita luzatzen diete herritarrei”