Farmakopearen gerra-estrategiaren aurrean, intsumisioa

Wikipediaren ergelkeria oinarrizkoa, farmakopearen gerra-estrategia eta sistemaren lotsagabekeria; hauen guztien aurrean nire amorru mugagabea eta intsumisioa ekarri nahi ditut hona.

Gernua, bai, pixa, txizaren aurka dagoen guda irekia jakituriaren tenplua den interneteko landan ikus dezakegu. Bilatu Googlen pixaren inguruan dauden sarrerak eta nekatuko zara gernuari egindako irainak ikusten, eta hauen fundamentu “zientifikoak”. Lehenbizikoa : sasi-terapia da, ez dago ikerketa zientifikorik, ez zientziadun laborategirik pixaren onurak eta osasunarentzako ondorio onak ikertu dituenik, eta jarraian zientifikoki ikertu ez dituzten uste ustelak botatzen dituzte, alaiki. Gernua zikina da, bakteriak izan ditzake, gorputzaren hondakin eta toxinak ditu eta gorputzak nahi ez dituenak bota egin behar dira komunetik. Pixa edatea oso kaltegarria gerta liteke, eta behin ez dakigun norbait hil omen zen pixa-xiringa bat sartu eta gero. Arlo honetan, edozein gauza esaten dute beraien seriotasun “zientifikoarekin”. Hori bai: argi dago pixaren konpetentziako laborategietatik esaten dituztela, eta komunikatzaile izena duten dena-daki buru eskas askok diotenak inongo oinarri zientifikorik ez duela Babel horretan.

Edozein kultura zaharretan daude pixaren erabilerari buruzko datuak. Azken belaunaldietan asko edo gutxi garen esaten ez dakit, baina erabiltzen da, erabiltzen dugu eta ordua da armairutik ateratzeko. Madonnak bideo batean erakutsi zuen bere gernua edaten duela bere osasunaren lekuko dela-edo erakusteko, eta horren ezagunak ez diren lagunek ere azaltzen dituzte beren bizipenak. Baina berdin dio: ziberkosakoek eta propaganda “zientziazaleak” mila moduz eraso egiten diote ezagutzen ez dutenari. Zeren eta nazkagarria eta atzerakoia, sasi-zientziatik irtendakoa den pixa xumea ez baitute dastatu.

Badira hogeita hamar urte lagun dudala neure pixa; hasieran proba egin nahi nuen ea ona den, itsas-ura, brokoli, patata eta azenarioa bezala. Txarra ez da, bestela intoxikatuta egon behar nuen honezkero, neohizkuntzaren soldaduek esaten duten bezala. Aldiz, ona dela esateko eskarmentua daukat.

Zein laborategi komertzialek esango luke ona dela zuk doan eta zeure esku daukazuna, beraiek saltzen badizute?

Gernua ona delako froga dago laborategi komertzialetan, botiketan UREA izenarekin komerzializatzen baitute. Zein laborategi komertzialek esango luke ona dela zuk doan eta zeure esku daukazuna, beraiek saltzen badizute?

Gure etxean, gure amonek nekazaritzan mindutako eskuak pixaz bustitako eskuohial batean biltzen zituzten, sendatzeko; aitzurra hartu aurretik eskuak pixeztatu. Herrian mando, asto eta zaldien pasten azpiak gizasemeen pixaz sendatzen ziren; botilletan gordetzen zen eta pasta kendutakoan gernu zahar hori ematen zieten zaurian, eta hurrengo egunean jartzerakoan txerri gantza edo antzekoa jartzen zieten igurtzaldiok arintzeko. Amona batzuen lekukotasuna jaso dut denboraren poderioz: tripetako minak jota egondakoari bere pixa hartzeko gomendatzen zioten. Zientzia metodoa baita, landa-testigantzak biltzea eskatu nahi dizuegu, laguntza txiki bat izango dena hain iraindua izan den altxor baliotsu honen erabilpenaren ospe malapartatua zuzentzeko.

Ulertzen dut erreparoa. Pixa ez da mahaikideen aurrean txarroan jartzeko gaia. Mukiak, txua, gorputzeko jarioak norberarentzat dira. Nik ez dut hartu, edan edo erabili besteen aurrean, eta ez zait gustu oneko iruditzen inork berea hurbilegi erakusten badit. Barne-barneraino sartutako nazka, tabua edo errespetua gainetik kentzea ez baita erraza. Baina ez dugu horregatik atzera egingo.

Aspaldi dugu lagun pixa xumea, eta esan dezakegu errekonstituiente edo suspergarri aparta dela

Pixaren erabilpenaren aztarnak, lekukotasunak eta aitorpenak jaso nahi ditugu. Guk geurea ematen dugu: aspaldi dugu lagun pixa xumea eta esan ahal dugu errekonstituiente aparta dela, ez dela batere zikina gorputzetik irteten denean, zaporea jan duzunaren araberakoa dela eta beti pronto dagoela. Ikertu duten laborategiek badakite haren osagarriak zeintzuk diren eta zein onura eman ahal dituzten. Sendabelarrekin gertatzen den bezala: sendagai merke, hurbil eta ezin errazagoak dira eta maite ditugunok zor diegu gure lagunei egia.

Mesedez, pixa erabiltzen baduzu, edo bere erabileraren testigantzarik baduzu, jaso, galdetu ahalik eta zehatzen nola, noiz, zertarako erabiltzen zuten ezagun horiek. Testigantzen bilduma egingo dugu, mundu osoan bere laguntzaz gizasemeek beren buruari lagundu diotelako froga.

Interesa baduzue, hurrengo argitalpen batzuetan bere osagaiez edota bestelakoez jardungo dugu. Osasuna!