Europar Batasuna arautegi farmazeutikoa egokitzen ari da RNAm ‘txertoak’ hedatzeko

Ondokoa irakurri dugu Mpr21 komunikabidean:

Urte honen amaieran Europar Batasunak arautegi farmazeutikoa berrikusiko du, eta presio-taldeak kanpaina sutsuan daude multinazionalek partida berriro irabaz dezaten Bruselan, ohi duten moduan.

Helburuetako bat da RNA mezularidun ‘txerto’ berriak “terapia genetiko” gisa sailkatuak izan daitezen eragoztea. Kanguro Taldeak, europar erakundeetako eta enpresa farmazeutiko handietako ordezkariak biltzen dituenak, presioa egiten du RNAm ‘txertoak’ eta gisako beste teknologia batzuk merkatura daitezen.

Ez da erabaki burokratikoa, ezta teknikoa ere, ekonomikoa baizik. Europako txertaketa programak erabaki horren menpe daude eta, ondorioz, baita txertoen salmenta ere. Industria farmazeutikoa saiatzen ari da RNAm injekzioak “txerto” moduan onar daitezen, eta horientzat “terapia genetiko” sailkapena saihesten. Horrek industriari baimenduko lioke eskuak libre edukitzea merkatu erabat berria garatzeko, genetikoki eraldatutako substantziei aplikatu beharreko segurtasun kontroletatik at.

Europako txertaketa programak erabaki horren menpe daude eta, ondorioz, baita txertoen salmenta ere

2020ko uztailaren 15ean, pandemiaren hasieran, Europar Parlamentuan prozedura azeleratu batean bozkatu zen “covidaren” kontrako txertoak garatzea baimentzeko legediaren indargabetzea, DNAn eta RNAn oinarritutako teknologientzat bereziki.

Baina hori ez zen behin betiko erreforma bat izan, pandemiari aurre egiteko beharrezkoak ziren saio klinikoak errazteko neurrien parte baizik. Orain, multinazionalek askoz gehiago behar dute, RNAm-n oinarritutako farmakoak sekulako moda dira-eta. Modernak probatan ditu RNAm txerto ugari: “covidarentzako” injekzioak, eta gripearentzako, eta giza metapneumobirusa, parainfluenza, RSV, CMV, Epstein-Barr-en birusa, HSV, barizela, herpes, GIB, Zika eta Nipah-rentzako ere bai. Sanofik saio kliniko bat abiatu du urtaroko gripearen kontra bere lehen RNAm txertoa erabiltzeko. Pfizer lanean ari da “covidaren” aurkako errefortzu txerto batekin, baita gripearen kontrako beste txerto batekin ere, eta tximuaren baztangaren kontrakoarekin, herpesaren kontrakoarekin eta “covid” eta gripearen kontrako txerto konbinatu batekin ere bai. Horrez gain, Sanofi eta GSK lehian ari dira gripearen kontrako eta arnasbideetako birus sinzitialaren (VRS) kontrako txertoekin.

Ohiko irizpideen arabera, antigenorik ez badago ez dago txertorik

Beren txostenak Europako osasun erakundeei 2020ko bukaeran erakutsi zizkietenean, Pfizer eta Modernako fabrikatzaileek esan zuten RNAm teknologia ez litzatekeela terapia genetikotzat hartu behar. Haien arabera, RNAm partikulek gorputzean iraungo zuketen egun gutxi batzuz bakarrik, eta ez omen zirudien giza genomari eragingo zionik. Modernak aitortu zuen, Burtsa eta Baloreen Batzordearen (SEC) aurrean 2020ko bigarren hiruhilekoan egin zuen aurkezpenean, “gaur egun FDAk RNAm terapia genetikoko produktutzat jotzen duela”.

RNAm injekzioak ez datoz bat osasun erakunde batzuek normalean ematen duten txertoen definizioarekin. Ohiko irizpideen arabera, antigenorik ez badago ez dago txertorik. Txertoak honela definitzen dira: “medikamentu prebentiboa, antigeno deritzen jatorri biologikoko substantzia aktibo batez edo batzuez osatua, gaixotasun baten kontra babesteko ematen dena”. Aitzitik, Medikamentuaren Europar Agentziak injekzio horien printzipio aktibo gisa izendatutako RNAm ezin da antigenotzat hartu.

Egoera bestelakoa da Amerikako Estatu Batuetan; bertan honela definitzen dituzte CDC-ek txertoak: “gaixotasunen kontra organismoaren erantzun immunitarioa estimulatzeko erabiltzen den gertakina”.

Mpr21etik ekarria eta Independentean euskaratua. Informazio gehiago jatorrizko argitalpenean: “La Unión Europea revisa la legislación farmacéutica para expandir las ‘vacunas’ de ARNm”