Aitzakia

Ume bat jolaserako prestatzen ari da

arte-faktu bat du eskuetan beste bat alboan

puxika bat

kanila publiko bat

aix! ze gutxi dakien oraindik publiko-pribatu jokoaz.

Jolasa prestatzera doa

eskua luzatzen du ur txorrota irudikatuaren freskotasuna begietan

aix! ze gutxi dakien oraindik gizon izateaz.

Amaren ahotsa dator orain:

-errespetatu arauak eta niri obeditu-

ze laburpen liluragarria

ze sintesi ia perfektua (utz diezaiogun perfektutasuna doktoreari)

euskal letren saria merezia izango luke

egokia den norbaitek epaia eman ezkero

errespetatu arauak eta niri obeditu

iltzeak ere gustuz urtzen dira

sublimea da erromantikoa kasi

zalantzatiarrek ehun makilkada hartzerainokoa

bizkarreko azalaren testura ondu behar baita

ongizatearen legeak lehengo erara idatziak izan daitezen

Umeak puxika bete du

harrigarriak dira umeak bere arintasunean

ez badira sakelekoan pornoa ikusten ari;

errege bihurtzeko prozesuak bete behar dira:

gym eta porn.

puxika bete eta gero han bertan lehertu behar du

amaren begiradak zati lehertuak biltzera bidaltzen du

bere lekua dute jolas hautsiek eta jostailuek

bozka-kutxak non dauden ikaste bidean

fisikaren legeak aldaezinak direla ikasiko duen maneran.

Ezagutzen dut emakume hori

oso gustatua egon nintzen berarekin

ez dakit zergatik tematzen naizen halako emakumeekin

gero arauak betetzen ikasten ez badut

obeditzea ahaztutzen bazait.

Gogora ekarri dit honek guztiak beste emakume bat

bilobari bapateko agindu-garraixia botatzen:

horrela ez da jolasten!

-Legearen zaindari onak dira emakumeak-

irribarretsu nengoen ni une hartan umearen ariketarekin

baina hori beste ixtori bat da.

Azkenean kontatu dizuedana

aitzaki hutsa da jende serioari puxika-galdera pare bat egiteko:

ze inporta zaizue ni lur-lau zalea banaiz,

zertan aldatzen da hilotzak etzateko duen mania.