Profesionaltasun falta
Duela egun batzuk, larunbat gau batez, La Sexta kate espainoleko aurkezle batek esandakoaren arabera, Iranen joan den urtarrilean gertatutako matxinadetan, non ehundaka pertsona hil ziren, irandarrak dira gaiztoak.
Hasteko, esan beharra dago kanpoko zigorrek eragindako lehen manifestazio baketsuetan ez zela ezer gertatu; Irango erregimenak ere negoziatzea onartu zuen, eta ondoren Mossadeko agenteek armak banatu eta poliziaren eta manifestarien aurka tiro egiteko agindua eman zuten, eta protestak bortizki larritu ziren. Gainera, manifestari bortitzek armarik gabeko polizia asko erre zituzten, Irango poliziek kaskoa eta borra besterik ez baitute eramaten.
Iranen historia ezagutzen dugunok badakigu, 1953an, petrolio-kontuengatik, irandarrek demokratikoki aukeratua zuten Mohammad Mosaddegh presidentea kendu zutela, Amerikako Estatu Batuek eta Erresuma Batuak emandako estatu-kolpe baten bidez. Presidente hautatu haren ordez, Reza Palavi Sha ezarri zuten.
Sha pertsiarrak, modu diktatorialean gobernatzeagatik, biztanleen haserrea eragin zuen. 70eko hamarkadaren amaieran, Sha erortzear zegoela aurreikusi zen, eta gehiengoaren aukerak gobernu komunista batenak edo errepublika islamiar batenak ziren. Azkenik, AEBren laguntzarekin, gobernu islamiarra nagusitu zen.
Laburpen gisa esango dut uste dudala Irango herria — edo beste edozein — kalifikatu aurretik jakin egin behar dela zer esaten ari zaren, nire ustez oso larria baita egiazkoa ez den informazio bat milaka pertsonari helaraztea.
