Zientzia, kontzientzia eta paradigma aldaketa izan da Ziordiako Amaraunan

Ziordiako (Nafarroa) Amarauna zentro autogestionatuan uztailaren 6tik 9ra II Jardunaldi Partizipatiboak: Zientzia, Kontzientzia eta Paradigma aldaketa izenburupean Cauac argitaletxe murtziarrak antolatutako topaketak burutu dira. Hirurogei lagun inguruk parte hartu dugu, gehien-gehienak espainiar estatutik etorriak eta Euskal Herriko batzuk ere bai. Aurtengoa bigarren edizioa izan da. Iaz Madrilen egin ziren Cauac argitaletxeak antotalutako I Jardunaldi Partizipatiboak, formatu klasiko batekin, hau da, txostengileen ponentziak entzutea eta eztabaidak. Aurten zenbait berrikuntza izan dira jardunaldien planteamenduan, hala nola, publiko parte-hartzailearen arteko aldi bereko eztabaidak, tailer praktikoak, jarduera ludikoak eta bizikidetza bera Amarauna zentroan.

Uztailaren 6an eginiko aurkezpen ekitaldian Cauac argitaletxeko kide batek azaldu zuenez, jardunaldi hauek Zientziaren paradigmei buruz taldean hausnartzeko eta iristen ari zaigun informazio guztia prozesatu ahal izateko komunikazio kooperatiborako gune bat izateko gero eta behar handiagoa dagoelako sortu dira.

Aurkezpenaren ondoren, Sara Romerok Soma izeneko metodoari buruz jardun zuen, Sarak berak sortutakoa garai batean izan zuen osasun arazo bati irtenbidea emateko helburuarekin. Bere hitzetan, oinarri zientifikoko birprogramazio mentaleko teknika iraultzailea da, gorputzean eta psikean aldaketa positiboak egiteko aukera ematen duena.

Uztailaren 7an, goizez, “Batu kendu ordez” izeneko mahai-ingurua egin zen. Helburua osasunari, gaixotasunari, biologiari eta gizakiari buruzko paradigma aldaketa bat suposatzen duten ikuspegi desberdinen arteko elkar-trukea egitea zen, ikuspuntu bateratzaile batetik. Mahaian honako hauek bildu ziren: Carlos Maudos, aurkezlea (Eremuaren paradigma), Javier Herráez (Ryke Geerd Hamerren Medikuntza Germaniar Berria), Gustavo García (Txinako Medikuntza Tradizionala), Antonio Tagliati (Orgonomia) eta Sara Romero (Burua-garuna-gorputza sistemaren optimizazioa). Parte-hartzaileen hitzetan, bost ikuspegi hauek gauza bera azaltzeko modu desberdinak dira. Mintzaldiak amaitu ondoren, parte hartu zutenen kezketatik eta proposamenetatik eta publikoaren ekarpenetatik sortutako hiru gai eztabaidatzeko parte-hartzaile guztiak hiru taldetan antolatu ziren.

Arratsaldez, zenbait jarduera eta tailer izan ziren aldi berean: itsas plasma hartzeak osasunean dituen onurei buruzko azalpenak (David Aguado eta Laia Gómez), ozonoterapiari buruzko hitzaldia eta ozonoterapia-esperientzia (Vanessa Bachero eta Juanfra Martí), orgonomiarako sarrera eta aplikazio praktikoak (Toñi Arce), autoezagutza tailer filosofikoa (Alejandro Moreno) eta kinesiologia tailerra (Carlos Maudos).

Aipamen berezia egin nahi diot ozonoterapiari buruzko hitzaldiari; izan ere Juanfra Martiren izena 2021ean hedabideek zabaldu zuten, Covid gaixotasuna pairatzen zuela (Juanfrak aldebiko pneumonia zela esaten du) eta ospitaleko tratamendu konbentzionalei aurka eginez ozonoterapia eskatzen zuela azalduz. Bere familiak babesa eskatu zion epaileari ozonoterapiaz tratamendua egiten lagutzeko, haren egoera terapia konbentzionalen bidez ZIUn larriagotu ondoren. 2021eko irailean alta eman zioten. Gaur egun, ozonoterapiaren onurak, terapia hau praktikatzeko berrikuntzak eta bere esperientzia zabaltzen dihardu.

Gauez, zineforuma izan zen “El extraño caso de Wilhelm Reich” filmarekin.

Uztailaren 8an, goizez, “Bizi dugun garaia ulertzea” izeneko mahai-ingurua izan zen. Ikuspegi desberdinetatik (historikoa, soziala, espirituala, etab.) gaur egungo gaiei heldu zitzaien, hala nola, transhumanismoa, zientzia/espiritualitatea, operazio psikologikoak eta kontzientziaren esnatzea. Zer gertatzen ari da munduan eta nola egiten diogu aurre norbanako eta gizatalde moduan? Galdera horri erantzun zioten Enric Costak, Alejandro Morenok, Joseba Argintxonak, Idoia Larrañagak eta Kikek. Aurreko egunean bezala, mintzaldiak amaitu ondoren, parte hartu zutenen kezketatik eta proposamenetatik eta publikoaren ekarpenetatik sortutako hiru gai eztabaidatzeko parte-hartzaile guztiak hiru taldetan antolatu ziren. Arratsaldez, Idoia Larrañagak “Ikerketa askerako, adierazpenerako eta ezagutzaren eraikuntza kolektiborako sareak eratzea” dinamika sortzailea gidatu zuen. Biodantza saio bat egin zen Fernando Martinezen eskutik eta ozonoterapia-esperientziaren bigarren saioa burutu zen.

Honez gain, aurreko eguneko tailerretako esperientziak partekatu ziren, tailer desberdinetan parte hartu zuten pertsonen artean.

Jardunaldietako azken egunean, uztailaren 9an, Arturo Vinuesak gidatu zuen konstelazio tailerra egin zen jardunaldietako parte-hartzaile guztiekin.

Amaitzeko, itxiera-ekitaldian, hurrengo jardunaldietarako ideiak eta proposamenak eta topaketa hauei buruzko balorazioak jaso ziren.

Orokorrean, oso giro onean hasi eta amaitu ziren jaldunaldi hauek, bertaratutakoen parte-hartze handiarekin, eta asko izan dira partekatu diren ezagutzak eta esperientziak. Beste urrats bat aurretik dagoen bide luzean.