Enkarterrin Makroeolikorikorik Ez plataformak trantsizio energetikoari buruzko topaketen zikloa hasiko du
Prentsa-oharra
Enkarterriko mendietan zentral eolikoak eraikitzearen aurka dagoen auzo- plataformak proiekzio eta hitzaldi ziklo bat antolatu du, udazkenerako bi proposamenekin hasita.
Datorren ostiralean, urriak 25, Francisco J. Vaqueroren “Vidas Irrenovables” dokumentala proiektatuko da Zallan. Filmak energia berriztagarrien industriaren hedapena Espainiako estatuko ekosistemak, ekonomiak eta landa munduko gizarteak suntsitzen ari dela erakusten du. Era berean, hainbat lurraldetan mehatxu horren aurka mobilizatu diren kolektiboen eta pertsonen esperientziak jasotzen ditu. Proiekzioaren ondoren, eztabaida bat egingo da zuzendaria bertan dela. Topaketa Zallako Kultur Etxean 18:30ean izango da.
Azaroaren 22an, Balmasedako Kultur Etxean, Zaragozako Unibertsitatean Lurraren Zientzietako doktorea den Antonio Aretxabala irakasle eta zientzia- dibulgatzailearekin, hitzaldi-eztabaida bat izango da. Bere azalpena ezartzen ari diren trantsizio energetikoaren ereduaren kontraesan ekologiko eta sozialez izango da, baita gerta daitezkeen eszenatoki eta alternatiba posibleez ere, ikuspegi dekrezentista batetik.
Jarduera hauek plataforma bere lurraldean aktibo dauden sei megaproiektuen aurka egiten ari den ekintzen parte dira. Horietako bi, Alén-Mello eta Argalario kordalei eragiten dietenak, Eusko Jaurlaritzak behin betiko ebazpena noiz emango zain daude. Kolitza-Sabugal mendilerroari eragiten dioten beste bi aurreproiektu fasean daude, eta Ubieta-Zipar zein Ilso mendiei eragiten dieten beste bi aurreproiektu datozen hilabeteetan argitaratu beharko lirateke. Beste bi megaproiektu, horiek ere Ilso eta Kolitza inguruari dagozkienak, oraingoz enpresa sustatzaileek beraiek ezetsi dituzte, baina horrek ez du eragozten beste enpresa batzuek, edo berberek, berriro planteatzea, baldintza hobeak baleude.
Proiektu andana honi Eusko Jaurlaritzaren Energia Berriztagarrien Lurralde Arloko Plana gehitu behar zaio. Plan hori onartze-prozesuan dago, eta zirriborroak hamahiru “azelerazio-eremu” hautatzen ditu eskualdean mota honetako industrietarako. Ondorioz, poligono eolikoak askoz ere azkarrago eta ingurumen-berme gutxiagorekin instalatuko lirateke. Plan hau onartuko balitz, Enkarterriko mendigune nagusiak 200 metroko turbinaz eta goi-tentsioko linea luzez josita egongo lirateke etorkizun hurbilean.
Herritarrek proiektu horiei erantzun diete 5.000 herri-alegazio baino gehiago aurkeztuz. Alegazio horiek irregulartasun administratiboak salatzen dituzte, eta eskualdeko lurralde osoan nahitaez aplikatu beharreko hegazti babestuen legeria aurkaratzen dute, sai zuriak habiak egiteko eremu ugari baitaude, Eusko Jaurlaritzaren Hegazti Nekrofagoak Kudeatzeko Planak babestutako espeziea. Hau da oinarri duten argudio juridiko nagusia, Aldundiaren hainbat txostenek bermatzen dutena, baina badira arrazoi gehiago ere, plataformako alegazioetan eta beste dokumentu batzuetan ere islatzen direnak: salatzen dute proiektu hauek, azpiegitura itzelekin batera, herri-mendien pribatizazioa eta landa-lurraldearen eta lurralde naturalaren industrializazioa dakartela; ohartarazten dute kalte larriak eragiten dituztela egoiliarren bizi-kalitatean eta osasunean, bai eta eskualdearen garapen sozio-ekonomikoan ere; era berean, galera larriak zehazten dituzte paisaia balioei eta ondare arkeologikoari dagokienez.
Trantsizio energetikoaren diskurtsoaren atzean espekulazio-burbuila bat dago
Plataformak bere komunikatuetan adierazi duenez, txikizio hori guztia ez da justifikatzen ez helburu klimatikoetan eta ez subiranotasun-helburuan oinarrituta. Aitzitik, trantsizio energetikoaren diskurtsoaren atzean espekulazio-burbuila bat dagoela salatu du, enpresa transnazionalen eta inbertsio-funtsen interesen alde baino egiten ez duena. Adierazi dute mega berriztagarrien hedatzeak ez dakarrela eskala handiko ingurumen kaltea soilik; izan ere, “deskarbonizazioaren” ustezko helburuari ere ez dio ekarpenik egiten, ez badarama fosilen kontsumoa murrizteko benetako programarik. Proiektu horien bidez inposatzen den trantsizio-eredua ekologikoki jasanezina, sozialki bidegabea eta antidemokratikoa dela diote.
Plataformak gai honen inguruan sustatzen dituen ekimen kulturalak, hala nola filmen proiekzioa eta adituekin solasaldiak, erakundeak inposatzen ari diren trantsizio energetikoaren eredua publikoki eztabaidatzeko eta zalantzan jartzeko guneak dira, eredu horrek herritarrak eta ingurumena mehatxatzen baititu interes ekonomiko eta espekulatiboen alde egiteko.
Plataformak planteamendu kritiko honekin eta Euskal Herrian zein penintsulan sortutako beste mugimendu batzuekin bat egiten du, lurraldea makro-berriztagarrien negozioaren aurka defendatzea aldarrikatzen dutenekin, ekologikoki zentzudunagoak eta bizitza eta giza eskubideak gehiago errespetatzen dituzten alternatibak daudela sinetsita.
Informazio gehiagorako, kontaktatu Jabi: 654 44 33 07.
Vidas Irrenovables dokumentalaren xehetasunetarako, kontaktatu Francisco J. Vaquero (Metáfora Visual): 622 29 11 17.
ENKARTERRIN MAKROEOLIKORIK EZ
enkarterrinparkeeolikorikez@gmail.com
