Agur,
Irailaren 8an, igandez, goizeko 11etan, Donibane Garaziko merkatuan, gogoeta prozesu berri baten lehen bilkura publikoa eginen dugu.
Gogoetak, independentistek euskal herriarentzat nahi dugun Estatuak egiazko demokrazia nola gauzatuko lukeen zehaztuko du.
Gogoetan, kontzeptuen definizio adostuak erabiliko ditugu. Hasteko, hauek:
Independentzia = bizi den lurraldean, beste kolektibitate baten aginpidearen mende ez dagoen kolektibitatearen egoera, barne eta nazioarteko subiranotasunean gauzatzen dena eta Estatuaren unitate politikoa dagokiona (Elhuyar hiztegia).
Estatu = unitate politiko burujabea den nazioa, nazio zatia edo nazio multzoa (Euskaltzaindiaren hiztegia).
Nazio = bere batasunaren ezagutza eta elkarrekin bizitzeko nahia ezaugarritzat dituen gizataldea (Euskaltzaindiaren hiztegia).
Burujabe = askea, bere buruaren jabe dena, inoren mende ez dagoena (Euskaltzaindiaren hiztegia). Demokrazia = boterea herriarengan datzala dioen doktrina politikoa (Elhuyar hiztegia).
Gogoeta abiatzeko, egiazko demokrazia izaiteko oinarrizko arauak zein diren zehaztuko dugu: zein arau behar dira boterea egiazki herritarren eskuetan izaiteko?
Ondotik, boterea egiazki herritarren eskuetan izaiteko, lokaletik nazionalera instituzio politikoak nolakoak izan behar diren zehaztuko dugu.
Interesatua den oro bilkura horretan esku hartzera gomitatua da, eta bilkuraren ondotik, bakoitzak etxetik ekarritako janariarekin elgarrekin bazkalduko dugu.
Laster arte.
Independentzia!
Gorka Torre eta Eneko Bidegain
Donibane Garazin, 2024ko agorrilaren 24an
