Ostia sarea

Marienia ez hunki

Ostia sarea 10 urte borrokan.

0

Joseba Martin Ayala

Ipuin kontalaria. Kanbo

Joan den urtarrilaren 6an, Kanboko auzapezaren agiantzak izan ziren,
eta gureak ematera bildu ginen hainbat lagun, MARIENIA EZ HUNKI
lelopean. Bistan denez Herriko etxeko oposizioa, NAHI DUGUN HERRIA,
bertan zen, eta haren zinegotzi batek, Xabier Heguyk, ondoko artikulua
prestatu du afera honen inguruan
:

Marienia, 10 urte borrokan

2014ean, Kanboko herriko kontseiluak Tokiko Hirigintza Planoaren (THP) aldaketa bat erabakitzen zuen. Horretan, besteak beste, herriko laborantzako lurren azalera goratzen zen. Bainan hala ere herritar batzuek horren kontra oraindik irauten duen borroka bat hasten zuten. Zergatik ote?

Tokiko Hirigintza Planoa

Lehen-lehenik, laborantzako lurren azaleraren goratzea aipatu behar da. THP berri hortan, laborantzari lur batzuk gehietzen zaizkie, eta beste batzuk kentzen. Gehitzen diren lurretan, bi kasu agertzen dira. Lehenik, jadanik laborantzarako erabiliak ziren lurrak, nahiz eta THPan «laborantzako lur» ez ezagutuak. Beraz lur horiek ofizialki «laborantzako lurrak» bilakatzen dira, nahiz eta konkretuki betidanik laborantzako erabiliak izan diren. Bigarren kasua, sekulan laborantzako erabiliak izanen ez diren lurrak: hiri erdian, eraikinen artean kokatzen diren lur puska tipi batzuk, edo traktore bat haietan ibiltzeko malda azkarregia duten beste batzuk. Ikusten ahal denez, konkretuki laborantzako lurrik ez da sortzen.

Aldiz, aurreko THPak «laborantzako lurtzat» onartzen zuen Marieniako lurra eremu eraikigarri bilakatu da. Lur horiek laborantzako kalitate haundikoak dira: holako lur ordoki batean, iparraldean askotan erabiliak diren aldapa azkarreko lurretan baino 3,5 mozkin gehiago ekoizten da. Laborantzako lur emankorrenak galtzen dira.

Beraz argi da laborantzako lurrak, nahiz eta theorian goratzen diren, errealitatean tipitzen direla.

Eraikigarri, zergatik? 2014 urtean Marieniako lurren eraikigarritasuna bultzatu zuen hautetsia Christian Devèze dugu, oraingo auzapeza. Eta Marieniako lurren jabeak Raoul Colbert (Kanboko klinika baten zuzendaria) eta Francis Salagoïty dira. Azken hau, Christian Devèzerekin batera, Baionako rugby talde profesionaleko lehendakaria izan zen 2015 eta 2018 artean.

Bestalde, 2017tik geroztik, THPa herri bakoitzak moldatzen du, bainan Euskal Hirigune Elkargoak du bozkatzen. Eta nor dugu elkargo horren lehendakaria? Baionako auzapeza den Jean-René Etchegaray. Azken honek THP hau kartsuki defendatu zuen bozkatua izan zelarik, 2019ko otsailean. Ikus daitekenez, lagunek elkar laguntzen badakite. Bozka horren ondotik, lur horien jabeek Bouygues Immobilier etxebizitza ekoizle eta saltzaile multinazionalari Marienia saldu diote. 3,77 hektarea 3 milioi euroren truke. Jakin behar da eremu hau «laborantzako lur» egon bazen, prezioa ez zela diru zama horren hamargarrena ere izanen.

Etxebizitzaren problematika oso larria da Iparraldean. Hemengo jendeak ezin du gehiago etxerik erosi edo alokatu, prezioak goregiak direlako. Ondorioz, jende askok etxebizitza sozialetan sartzeko xedea du, bainan hor ere, leku eskasa. Frantziako SRU legeak, 2000 urtean bozkatua, 3.500 biztanletik gorako herriak % 25 etxebizitza ukaitera behartzen ditu, eta hori betetzen ez dutenei isun haundiak ematen dizkie. Kanbon 6.000 biztanletik gora bizi dira, bainan etxebizitza sozialen tasa, % 8koa besterik ez da. Horrek argiki erakusten du orain arte Herriko Etxeko gehiengoak nolako interes eskasa duen populazioaren etxebizitza beharrentzat. Bainan isunen beldurrak gogoeta egitera ekarri ditu, eta ondorioz Bouygues Immobilieri galdegin diote bere proiektuan (100 etxebizitza) erdia soziala izan zedin. Eta orduz geroztik, prentsan proiektu hau defendatzen duelarik, auzapezak goraki dio bere misioa herriko jendeari etxebizitza eskaintzea dela, eta etxebizitza sozialak ere. Hau berri ona! Zeren eta aurreko urteetan Herriko Kontseiluko oposizioak holakoen eraikitzea proposatzen ziolarik, ez zion batere kasurik egiten.

GIECeko adituek klima aldaketaren ondorioek elikagaien segurtasunik eza ekarriko duten garaiez ohartarazten gaituzte. Orduan, ondoko belaunaldietaz ardura pixka bat baldin badugu, laborantzako lurrak ezinbestean babestu behar ditugu, jakinez betoian janari guti ekoizten dela.

Iparraldean laborarien kopurua etengabe behera doa, eta laborantzako lurrak murrizten. Fenomeno hau beste leku askotan gertatzen da, bainan hemen berezitasun bat badugu: laborantzatik etortzen ez diren gazte batzuk plantatu nahi dute. Bainan horretarako, lurren eskuratzeko laguntza behar dute. Herriko etxeek laguntza hori ekartzeko ahalak badituzte. Iduriz, Kanboko auzapezaren kezkak bestelakoak dira. Ondokoen bizitza baldintzen eta bere lagunen oraingo diru gosearen artean, hautua egina du !

10 urtez borrokan

Erran bezela, Herriko Etxeko kontseiluko oposizioa, abertzalez, ezkertiarrez, ekologistaz (edo 3ak batera) osatutako Nahi Dugun Herria taldea, hastapenetik proiektu horren kontra altxatu da. 10 urte horietan, beste ekologista edo laborari elkarteen laguntzarekin, ekitaldi ainitz antolatuak izan dira: biltzar publiko, petizio, elgarretaratze, manifestaldi, lurren okupazio etabar.

Proiektu atzerakoi horren kontrako ekintza juridikoa ere izan da THParen kontrako errekurtso baten bidez. Hau galdua izan da. Euskal Hirigune Elkargoak ordainduriko abokatuek gezurrez jositako alegazio bat egin dute : Lur horiek ez dira laborantzako «kalitate haundikoak» (batere frogarik ekarri gabe), haietan ez da belarrik mozten (urtero egina delarik), pentze hortan ibiltzen diren ardiek Itsasuko partean baizik ez dute jaten (lur hau bi herrien artean da, eta mugan ez da hesirik), eta beste holako asko. Deia egina izana da, eta bigarren auzi horrek 2024eko uda aintzin iragan beharko luke.

Marienia ez hunki !

Beraz uda baino lehenago, Bordeleko auzitegi administratiboak lur horien suntsiketa «zilegia» denetz erabaki beharko du. Bainan guretzat gauzak argi dira: auzitegi horren erabakia edonolakoa izanik ere, Marieniako lurrak laborantzako geldituko dira! Nahiz eta jauntto horiek «betidanik egina izan den bezela» haien arteko tratuak interes orokorraren gain pasarazi nahi izan, ez ditugu egiten utziko. Ondoko hilabeteetan, orain arte baino gehiago, mobilizatu beharko dugu.

Berriz ere diogu : etxebizitzak bai (bereziki sozialak), bainan ez laborantzako lurretan! Marienia ez hunki!

Nahi Dugun Herria

Informazio gehiago facebooken: OSTIAsarea
Estekan elkarretaratzearen bideotxoa.

MARIENIA EZ HUNKI Ostia sarea segitzeko Ostia: t.me/okupazioak

Zuri txanda!

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

Utzi iruzkina, izen eta abizenez

Azken artikuluak