Uribe Kosta

Elkarretaratzea bihar: Herri mugimenduak aurrera!

Hilak 27, larunbata, Sta. Eugenia plazan (Itzubaltzeta/Romo), 18:00tan. Eurena ez baita zaintza, indibidualismoa, kontsumismoa, espekulazioa eta errepresioa baizik! Aspaldidaniko herritarron eskubide eta askatasunaren murrizketa sistematiko motel baina pisutsuak abiadura osoa hartu duen honetan, altxa dezagun burua Euskal Herri osoko herri mugimenduek!

5

Patrik Unzurrunzaga Garate

Koroa Biluzikeko kidea. Algorta

Herritarron eskubide eta askatasunaren murrizketa sistematikoa aspalditik datorkigu, zapal-makina modura, motel, baina bere pisu osoarekin. Baina azken urte honetan, “normaltasun berria” dela medio, abiadura osoan sartu da gure bihotz barruraino.

Bestalde, alderdi politiko guztiek (azkenik) argi utzi digute haien xedea ez dela gure eskubideen defentsa, baizik eta estatu eta “kapital handiaren” defentsa. Horregatik herri mugimenduak duen garrantzia eta indarra aldarrikatu nahi dut.

Herri mugimenduaren izaera dugu bide bakarra, gure eskubideak bermatu eta sistema faltsu honekin bukatzeko. Hau dela eta, Uribe Kostan egingo den elkarretaratzearen inguruko deialdia partekatu nahi dut zuekin, nahi duena hurbildu dadin eta Euskal Herri osoko herri mugimenduek burua altxa dezaten!

Herri mugimenduak aurrera!

Prentsa-oharra

“Herri mugimenduak aurrera” lelopean elkarretaratzea deitu dute Uribe Kostako hainbat eragilek. Otsailaren 27an Itzubaltzetako S. Eugenia plazan elkartzera deitu dute, arratsaldeko 18:00etan, egun bizi duten egoera salatzeko.

Salatu nahi dituztenen artean azken hilabeteotan jasandako erasoak aipatzen dituzte (Uribe Kostako gaztetxe eta bestelako espazioen kontrako desalojo eta mehatxuak), eta baita “ustez osasuna bermatzeko hartutako neurriek” eragindako oztopo eta zailtasunak ere, euren jarduna
normaltasunez gauzatzea ekiditen dietena: espazioen falta, biltzeko debekua, udalerriz lekualdatzeko debekua, kalean ekintzak egiteko debekua…

Guzti honen aurrean mugimenduok euren jardunaren zilegitasuna eta ezinbestekotasuna azpimarratzen dute, jardun horrek zapalduen eskubideen defentsa eta zaintza eta alternatiben eraikuntza baititu helburu. Instituzio legegileen, judizialen eta errepresiboen hipokrisia azpimarratu nahi dute ere, “zaintza”ren aitzakiapean euren betiko baloreak sustatzen jarraitzen dutela salatuz: “(Eurena) ez da zaintza; indibidualismoa da / kontsumismoa da / espekulazioa da / errepresioa da”. Elkarlanera deia egiten dute, egoera zahar-berri honen aurrean autodefentsara, elkarzaintzara eta antolakuntzara deituz.

Uribe Kostako herri mugimenduak

Horra kontzentrazioan egingo duten aldarria jasotzen duen testua:

“Herri mugimenduak aurrera” Irakurketa

Uribe Kostako herri mugimenduetan gabiltzanok gizartean eragitea izan dugu eta badugu helburu, komunitatea sortuz, sareak eraikiz, justizia soziala aldarrikatuz eta horren defentsa aktiboa eginez.

Guzti hau modu eta espazio ezberdinetan egiten dugu, mugimendu bakoitza bere berezitasun eta estilo propioarekin, baina danok horizontaltasuna eta jarrera sortzailea ditugula oinarri, hegemonikoa den mundu kapitalistari aurre eginez. Gure jardun hau ezinbestekotzat jotzen dugu.

Aurrean kontsumismoa, indibidualismoa, indarkeria, espekulazioa eta baliabideen xahuketa sustatzen dituztenak ditugu, defendatzen dugun hori mespretxatzen eta zapaltzen duten horiek, errepresioa euren tresna delarik.

Gaur egun, COVID19aren fenomenoa bizi dugun honetan, hartutako neurriek, ustez osasuna bermatzeko, aurretik zeuden desoreka batzuk sakondu dituztela salatu nahi dugu. Zaintza aitzakia dutela, herri mugimenduok hainbat eta hainbat eraso eta eskubide urraketa jasaten ari gara: biltzeko ezintasuna, kalean ekintzak egiteko zailtasuna… Oso presente ditugu gurean ematen ari diren erasoak: Itzubaltzeta III gaztetxearen desalojoa, Txorimalo eta Danontzat gaztetxeen eta Astika Herriaren arrisku egoera… eta eraso horien aurrean antolaturiko autodefentsa ekintzen errepresio poliziala eta judiziala.

Horregatik, inoiz baino gehiago gure jarduna aldarrikatzen dugu, herri mugimenduak beti egin izan duen borroka zilegi eta beharrezkoa izaten jarraitzen duelako.

Euren errepresioa ez da zaintza.
Euren espekulazioa ez da zaintza.
Euren indibidualismoa ez da zaintza.
Euren kontsumismoa ez da zaintza.
Zaindu dezagun benetan zaintzen gaituen herri mugimendua!

5 erantzun “Elkarretaratzea bihar: Herri mugimenduak aurrera!” bidalketan

  1. Zail egingo zaie, niri ere zail egiten zaidan eran, EHbildun ezker pentsamendu eta ideologiarekin lan militante itzela egiten ari diren asko eta askori “partidu politiko guztiak” hori irakurri eta besterik gabe onartzea, baina politika sanitarista neoliberal hutsa auzitan jartzen ez den bitartean edozein mugimenduk edo partidu politikok arriskuan jartzen du bere izaera.
    Denborak eta espazioak patriarkalak dira erabat eta muturreko eragina izan nahi dute sozietatean. Zientzia-jende baten harrokeria arriskutsua da, beste asko fede onez ari da eta lan eskerga hartuz bere gain; gauzak ez dira zuri edo beltz bere horretan, bai ordea dialektiko eta osagarri.
    Zalantzek eta galderek onura ekartzen dutelakoan nago, dotrinak militarismo errepresiboa dakar eta herritarrok pairatzen dugu ezinbestean, batzuek besteak baino gehiago. Elkar zaindu dezagun eta errepresio mota guztiei aurre egin.
    Ongi izan.

  2. Kontuz ibil daitezela EH Bilduren ordezkariak. Ezkerrekoa eta abertzalea den jende asko bizkarra emango diegula Mundu Orden Berriaren ideologiaz ez badira aldentzen. Zeren eta, gaur egun, Davoseko Foroan defendatzen diren politikak asimilatu baitituzte eta “askatasun” hitza oso handi gelditzen zaiela erakusten ari baitira.

  3. Gorka, “bere izaera arriskuan jartzea” baino larriagoa da kontua, nire ustez. Niri ere zuri bezala zail egiten zait onartzea, eta ez dut inoren lan eskerga militantea gutxietsi nahi. Baina errealista izan beharra dago. Udaberrian Arnaldo Otegiri (!!!) irakurri nion (gazteleraz) “eskaldunon erronkak zaintza eta digitalizazioa” direla. Nola ezkontzen dira bi kontzeptuak? Digitalizazioarekin uler bedi robotikaren nagusitzea (baita zaintzarako ere!), pertsonen zelatatze erabateko eta normalizatua eta lanpostuen galera masiboa. Beraz… inozoa da ala inozoarena egiten du? Dena dela ere, bizi dugun ofentsiba honetan tonto util galantak izaten ari dira (‘izaten ari gara’ esan behar al genuke??)

    Esan egin behar da, esan egin behar zaie.

    Ondorioz… animoak eta indarra Uribe Kostako herri mugimenduei!!

  4. Oso inozoa izan behar da tonto utilak direla sinesteko. Gizartean onartua izatearen prezioa da, eta horrekin dago lotuta Madrilen segitutako jokua, Pedro Sanchezi emandako laguntza batik bat.
    Sozialdemokrazia internazionalean Bidenen eskutik integratzeak horrelako peajeak ditu.

  5. Iritsi garen honetan uste dut alderdi “politikoen” jardunak -salbuespenik gabe- ez lukeela inor ustekabean hartu behar.
    Azken hauen ustezko aurkakotza ideologikoa, figurante aurrehautatu, atsegin, usteldu edo izutuen ardurapean, Estatu bakarraren pentsamendu bakarrean gertatzen da.
    Interpretatzen dituzten fikziozko kritika eta eztabaidak botere finkatuari komeni zaiona esatera mugatzen dira, beren ideiak sortzeko, horiek baitira toleratzen eta zabaltzen diren bakarrak.

Utzi iruzkina

Azken artikuluak