Donostiako Metroaren Mirakontxa-Easo zatiaren eraikuntza-lanetan %164eko gainkostuak sortu direla salatzen du Satorralaiak
Donostiako Metroaren obraren gastuei buruz Satorralaiak zuzendutako informazio eskaera bati erantzunez Eusko Jaurlaritzak joan den urtarrilaren 21 egindako txosten batean ematen dituen datuen arabera, Mirakontxa-Easo zatiaren eraikuntza-lanetan %164eko gainkostuak sortu direla ondorioztatzen da. Izan ere, Mirakontxa-Easo zatiaren obrak 53 milioi eurotan adjudikatu ziren 2017ko abenduaren 18an, eta egungo zenbatespenean 140 milioira igo da zati horren obra-kontratuen indarreko aurrekontua, hain zuzen ere Jaurlaritzaren txostenean zenbatzen diren “Mirakontxa-Easo I” eta “Mirakontxa-Easo II” faseetako 49’2 eta 90’6 milioien batuketa egin behar baita (zenbateko horiek BEZik gabeak dira). Hortaz, hastapeneko adjudikazioaren 53 milioiko kosteari beste 87 milioiko gastua gehitu zaio, %164ko gainkostuak sortuz.
Atxikita doa Jaurlaritzak bidalitako txostena (ikus behean atxikitako artxiboa). “Laburpen” idatziaren 3. orrialdean, “Guztizko aurrekontuaren zenbatespena” ataleko taulan ikusten denez, Mirakontxa-Easo tartearen “1 Faseko” eraikuntza-lanetan 49’2 milioi gastatu ziren — lan horiek, zehazki, 2020 urtearen erdialdean Zubieta kalean sortutako zuloaren eta “indusketa lanen bi fronteetan ustekabean agertutako hondar eta ur kopuru handien” ondorioz obrak geldiarazi egin behar izan zituzten arte egindakoak dira. Eusko Jaurlaritzak orduan adierazi zuenez, obraren kosteen %80ko igoera ekarriko zuten arazo horiei aurre egiteko garatu beharreko eraikuntza sistema berriek. Hori dela eta, Mirakontxa-Easo zatia eraikitzeko Sacyr, Cavosa, Campezo, Mariezcurrena eta Zubieder enpresek osaturiko ABEEari esleitutako kontratua desegin zuen, eta tunelaren zulaketa-lanak amaitzeko Mirakontxa-Easo tartearen “2 Fasea” izeneko eraikuntza-proiektu aldatu batekin adjudikazio berri bat egin zuen. Bigarren kontratazio hori 47’8 milioiko prezioan adjudikatu zion Jaurlaritzak 2021eko apirilaren 22an Altuna y Uria, Acciona eta Iza enpresen elkarteari. Alabaina, harridura eta haserrea eragiten du txostenean ikusteak nola aipatu 47’8 milioietatik 90’2 miliora igo den Mirakontxa-Easo tartearen “2 Fasea” deituriko obra-kontratuaren egungo zenbatespena: hau da, adjudikazioan agindutako prezioa berriro ere bikoiztu egin da, eta Mirakontxa-Easo zatiaren obraren “1 Fasea”n gastatutako 49’2 milioien eta “2 Fasea”n gastaturiko 90’6 milioien batuketa eginda, osotara 140 milioira igo dela ondorioztatzen da zati horren eraikuntzaren kostea. Mirakontxa-Easo zatiaren eraikuntza-lanetan %164eko gainkostuak sortu dira beraz, 2017an egindako hastapeneko esleipenean obra hori egiteko aurrikusitako aurrekontuarekiko.
Donostiako metro-pasantearen obraren guztizko aurrekontuari dagokionean, 2016 urtean onartutako proiektuaren “Estudio Informatiboa”n 172 milioikoa zen hori (BEZa barne), baina gaur egun 280 milioira heltzen da gastua, txostenean zenbatzen den 232 milioiko aurrekontuari BEZaren %21 erantsita.
Eusko Jaurlaritzak eta Donostiako Udal Gobernuak publikoki inoiz informatu ez duten hirugarren emergentziazko egoera bat suertatu zela erakusten du horrek
Bestalde, txostenaren “laburpena”ren ondoren aurkitzen diren “emergentziazko obren” hiru espedienteen inguruan arreta jarri nahi dugu. Honi dagokionean, 3 zenbakia duen dokumentua (2021eko martxokoa) Easo Plazaren azpian kokatzen den “1+418 Puntu Kilometrikoan egindako emergentziazko obra” bati dagokio, 5’8 milioiko aurrekontuarekin. Jarraian, 4 zenbakia duen dokumentuak (2021eko ekainekoa) Kontxako hondartzaren azpian kokatzen den “0+750 Puntu Kilometrikoan tunelaren frontean egindako euspen, zigilatze eta eraikinen egonkortze lanak” ditu aipagai, 2’7 milioiko aurrekontuarekin; hain zuzen ere, 2020ko ekainaren 5ean hondartzaren azpian tunelaren zulaketan gertatu zen ezbehar larriak eta Zubieta kaleko etxebizitza-eraikin baten zimenduetan sortu zen zulo sonatuak eragindako emergentzia egoerari dagokio hori. Are gehiago nabarmentzekoa da, ordea, 5 zenbakia duen dokumentuak (2024ko apirilekoa) aipagai duen “Expediente emergencia nº1 Miraconcha-Easo Fase 2_ampliado” izen arraroko emergentziazko obra, txostenaren arabera 14 milioiko aurrekontua izan zuten emergentziazko lan horiek Erdialde-Kontxako Geltokiaren obragunean egin baitziren. Eusko Jaurlaritzak eta Donostiako Udal Gobernuak publikoki inoiz informatu ez duten hirugarren emergentziazko egoera bat suertatu zela erakusten du horrek.
Donostiaren neurriko hiri batean, badaude garraio publiko egoki bat eskaintzeko aukera ezberdinak, halako obra erraldoi eta xahutzailerik gabe
Satorralaiaren ustez, desmasia horiek guztiak gure hiriko lurpearen baldintzak aintzat hartu gabe Erdialde-Kontxako zonalde komertzial eta turistikora metro gisako azpiegitura bat kosta ahala kosta eraiki nahi izatearen ondorio dira, hiritarren gehiengoak zeharo behargabekotzat jotzen duen proiektu bat izanik gainera. Donostiaren neurriko hiri batean garraio publiko egoki bat eskaintzeko aukera ezberdinak badaudela pentsatzen segitzen dugu, halako obra erraldoi eta xahutzailerik egin behar izan gabe.
Satorralaia bizilagunen mugimendua
Emaila: satorralaia2@gmail.com
(Tlfnoa 695715510)
