Indiaganako manifestua
BORROKA ETA ALDARRIKAPEN EGUNA MAEZTUN
Joan den apirilaren 22an Euskal Herriko Agintaritzaren Aldizkarian (EHAA) Ekonomiaren Garapen, Jasangarritasun eta Ingurmen Sailaren iragarki baten bitartez Laminoriako zentral eolikoaren aurre-administrazio eskabidearen oinarrrizko proiektua eta ingurumen-inpaktu txostena jendaurrera 30 egunetarako argitaratu zen. Era berean, eskabide honi alegazioak aurkezteko epea ekainaren 17ra arte luzatu zen.
Arabako Mendiak Askek ezinbestean dagozkion alegazio herritarrak prestatu ostean gure lurralde osoan hauek jasotzen ari da, bi helburu nagusirekin. Batetik, bide administratibotik gure natur eta sozial ondarea mehatxatzen eta kontzejuen aurkako erabakiak isilarazten dituen makroproiektu suntsitzaile hau geldiarazi nahi da. Bestetik, herritarrek natur eta landa-eremuek bizitzaren babeserako duten garrantziaz eta gezurrezko trantsizio energetiko baten aitzakian gerta daitekeen eremu hauen, horietako asko komunalak, okupazioak nahiz merkantzia bihurtzeak dakartzaten industrializazioaz eta pribatizazioaz informatu eta kontzientzatu nahi da, argi utziz proiektu honek etorkizunean haien sarbidea eta erabilgarritasuna baldintzatuko lukeela.
Hau dela eta, Arabako Mendiak Askek datorren ekainaren 8rako aldarrikapen eta borroka egun hau antolatzea erabaki du. Lehenik, goizean Indiagana mendira doan mendi martxa egingo dugu. Bigarrenik, arratsaldeko 3etan Maeztuko frontoi estalian bazkari herrikoi bat ospatuko dugu. Eta azkenik, arratsaldeko 6etatik aurrera kontzertu sorta bat egongo da, GANZUA, TRIKOMA BANDA, SKAREGGEKASKO, HITZ TANTAK eta BARRIOMANIA taldeek eskainia. Ekintza ezberdinetatik jasotako diru guztia Azazetako Zentral Eolikoaren proiektua judizialitzatzearen kostuak ordaintzeko erabiltzeko erabiliko da, jakinda berau dela proiektua gelditzeko azken aukera.
Mendi martxan Uribarri-Jauregiko inguruko mendietan zehar Indiagana mendira joango gara, luzera eta irteera ordu ezberdina duten 2 ibilbidetan oinarrituta, baina bidearen zati nagusia amankomunean eginda. 11 km-ko luzera duen ibilbide luzea Rotaldeko Azpiestaziotik goizeko hamarretan irtengo da, eta motza, aldiz, 5,5 Km luzerarekin, Laminoriako gainetik ordu erdi bat beranduago. Hain zuzen ere, ibilbide luzea motzari puntu honetan batuko zaio eta biek Indiaganaraino doan mendi magala bertatik igo dute. Iturrietako Mendizerra eta Gasteizko Mendien lotura egiten duten mendi hauek 2 zentral eolikoren, zentral fotoboltaiko baten eta beraiekin lotutako azpiegituren (transformazio zentroa eta ebakuazio linea) mehatxupean daude. Bestalde, aipatzekoa da mendi martxa igaroko den eremuan Laminoriako Zentral Eolikoaren 5 aerosorgailu eraiki nahi direla.
Araban erreferentzia den Indiaganako mendi gain honetatik ondorengoa plazaratuko dugu:
- Azazetako eta Laminoriako zentralen hamasei aerosorgailuak kokatu nahi diren mendi eremu eder honek paisaia aldetik eta natura aldetik duen balio handiaren aldarrikapena egitea. Bi proiektuak oligopolio enpresa batek bultzatzen ditu Arabako Foru Aldundiaren eta Eusko Jaurlaritzaren arduradun politikoen oniritziarekin.
- Arduratsuak diren politikariak faltan botatzen ditugula agerian jartzea. Politikari hauek, bertako landa-eremuaren defentsan etengabe lan egiteaz gain, Arabako gizarteak eta lurraldeak eskatzen dituzten egiazko konpromezua eta adorea erakutsiko beharko lituzkete. Modu horretan, iruzurrezko garapenaren aldeko jarrera konplizea izateari utziko liokete.
- IBERDROLAk eta Energiaren Euskal Erakundeak osatutako AIXEINDAR, S.A. enpresaren aurkako salaketa egitea, Azazetako eta Laminoriako zentral eolikoak bitan banatzean lege iruzurra egiten ari delako, jakinda biek mendikate berbera partekatzen dutela, beraien arteko distantziak minimoak direla eta Azpiestazio Elektrikorainoko energiaren ebakuazio linea berbera partekatzen dutela. Modu horretan, enpresak 16 aerosorgailuko zentral baten ingurugiro baldintza zorrotzak saihestu nahi ditu.
Estrategia horren aurrean, administrazioetako arduradunei ESKATZEN DIEGU eragin larria jasan dezaketen natura eta gizartea defenda ditzatela, lurraldearen interesak oligopolio elektrikoko enpresen gainetik lehenetsiz. Gainera, EXIJITZEN DIEGU alde batera utz dezatela lurralde antolaketan interes pribatuak komunitarioen gainetik egotea sustatzen duen lege iruzurra.
Azkenik, herritarrei egoera honen aurrean erreakzionatzeko eta defendatzeko deialdia egiten diegu eta datorren ekainaren 8an Maeztun ospatuko den borroka eta aldarrikapen egunean parte hartzera gonbidatzen ditugu.
AZAZETA-LAMINORIAtik EZ DIRA PASAKO
Arabako Mendiak Aske
