Donostia Defendatuz koordinadorak gaur emandako prentsaurrekoaren informazioa:
DONOSTIA EZ DAGO SALGAI! HIRI-EREDU BIZIGARRI BATEN ALDE
MAIATZAK 26 IGANDEAN MANIFESTAZIOA:
Hainbat auzo-elkartek eta talde sozialek osatutako Donostia Defendatuz koordinakundeak manifestazioa deitu du datorren maiatzak 26 igandean, eguerdiko 12:00etan Easo plazatik abiatuta. “DONOSTIA EZ DAGO SALGAI! HIRI-EREDU BIZIGARRI BATEN ALDE” lelopean, herritar guztiei mobilizazio honetan parte har dezaten dei egin nahi diegu, hain zuzen ere Donostia merkatuko indarren nahierara salgai jartzen duen udal hirigintza-politika errefusatzeko, eta, aldi berean, hiri-eredua bereziki klase herrikoiei begira, ingurune ekologikoaren berreskurapenari begira, eta auzoen beharrei begira eraldatu beharra dagoela aldarrikatzeko.
Donostia merkatuko indarren nahierara salgai jartzen duen udal hirigintza-politika errefusatzen dugu eta hiri-eredua bereziki klase herrikoiei begira eraldu behar dela aldarrikatzen dugu
Donostiako Udala herritarren premiekin zerikusirik ez duten hirigintza proiektuak eta eragiketak sustatzen eta inposatzen ari dela salatzen dugu. Arreta aberastasunean eta luxuan jartzen duen bitartean, donostiarren zati handi baten sentipena da Donostia gero eta bizigaitzagoa bilakatzen ari dela: izan ere, hiria turistifikazio-prozesu basati batean murgildu da, herritar gero eta gehiago etxebizitza duin eta eskuragarri bat lortzeko ezintasunaren ondorioz beren auzotik kanporatuak izaten ari dira, ondare arkitektonikoa eta naturala suntsitzen doaz, berdeguneak murrizten, merkataritza txikia galtzen eta hiriko ehun soziokulturalari ere kalte eragiten ari zaio. Ildo horretan, deialdi honekin bat egin duten 42 talde sozial eta auzo-elkarteek adostutako manifestuak honako arazo hauek nabarmentzen ditu, besteak beste:
>> Etxebizitza-arazoaren larrialdia: Oinarrizko premia bat dena, merkatuak merkantzia bihurtzen du, eta Donostiako hiria, gaur egun, monopoliaren joko-taula bat da funts putreentzat eta inbertitzaile turistikoentzat, horrek berekin dakartzan higiezinen burbuila eta prezio eskuraezinekin. Gainera, udal-politikak alokairu sozialeko eskaintza mugatu egiten du, eta lehentasuna ematen dio etxebizitza espekulatiboari. Gauzak horrela, etxegabetzeek aurrera jarraitzen dute, eta, aldi berean, belaunaldi gazteak eta errenta baxu eta ertainak dituzten ehunka bizilagun Donostiatik kanporatuak izaten ari dira, ezin dutelako hiri gero eta garestiago eta elitistago honetan bizitzen jarraitu.
>> Gehiegizko ustiapen turistikoa: Hotelen irekiera neurriz kanpo sustatzeak hiriaren turistifikazio masiboa ekarri du, Euskadin dauden pisu turistiko guztien % 40 ere Donostian pilatzen direlarik. Masifikazio turistiko horrekin batera, ostalaritzak espazio publikoa gero eta gehiago okupatzearen eta pribatizatzearen ondorioz, aisia- eta kontsumo-espazio soil bihurtzen ari diren auzo batzuetan bizimodu duina izatea eta garatzea eragotzi egiten da.
>> Hirigintza-politika erasokorrak: Epidemia baten gisa zabaldu dira lurzoru naturalaren artifizializazioa eta berdeguneen eta zuhaiztien suntsiketa. Hala, Manteoko parkea suntsitu dute Basque Culinary Center-en bigarren egoitza eraikitzeko; San Bartolome muinoaren magala txikitu eta hormigoiez eta beiraz estali asmo dute, bertan merkataritza-gune bat eta 4 solairuko aparkalekua egiteko; era berean, Añorgako Belartza Goikoa landa-eremua lehengoratzera behartzen duen epaia ez dute bete eta inguru hori erabat suntsitzea dakarren makro-poligono bat sustatzen ari dira; halaber, Añorga Txiki eta Herrera auzoei eragiten dieten neurriz kanpoko hirigintza-planak eta Altzako Auditz-Akularreko landa-ingurunean 3.000 etxebizitza baino gehiago eraikitzeko makroproiektua berriz abian jarri dutela aipagarriak dira, besteak beste.
Botere publikoek biztanleentzako hiri batean pentsatzeari utzi egin diote, eta interes ekonomiko pribatuak baino ez dituzte bideratzen
Donostia Defendatuzen ustez, jarduera horiek guztiak modu sistematikoan interes ekonomiko handiei mesede egiten dieten udal-politiken ondorio dira. Hau da, botere publikoek biztanleentzako hiri batean pentsatzeari utzi egin diote, eta interes ekonomiko pribatuak baino ez dituzte bideratzen. Donostian negoziorako hiri-eredu bat eraikitzen ari da horrela, bizitzeko hiri baten ordez.
Beraz, biharko manifestazioan ahalik eta parte-hartze handiena biltzeko deia egiten dugu, Donostia modu arriskutsu eta atzeraezinean saltzen ari den udal hirigintza-politika errefusatzeko eta hiri-eredua aldatu nahi dugula ozenki aldarrikatzeko.
Donostia Defendatuz koordinakundea
Harremanetarako telefonoa: 685767797/ Emaila: info@donostiadefendatuz.org
