Apirilaren 13an, larunbata, manifestazio nazionala Azpeitian

Prentsa-oharra:

Lurraldearen defentsan lanean ari garen Euskal Herriko hainbat mugimenduk eta plataformak gure indarrak batu ditugu natura eta landa-ingurunea suntsitzen dituzten makro proiektuen inposaketari aurre egiteko. Borroka hau aurrera eramateko Lurraren Defentsan, Euskal Herria Bizirik Sarea sortu dugu.

Idatzi honen bitartez APIRILAREN 13an Azpeitian burutuko dugun manifestazio nazionalerako gonbidapena luzatu nahi dizugu.

Hauek dira manifestazio nazional honen aldarrikapen nagusiak:

• Instituzioak larrialdi ekologikoaren aurrean hartzen ari diren neurriak salatzea. Europatik abiatuta, Espainiar eta Frantziar estatuak, Hego Euskal Herrian agintzen duten EAEko eta Nafarroako gobernuek, guztiek bere egin dute klima larrialdiari aurre egiteko kapitalismo berdearen apustua. Horren ondorio dira esaterako, onartu berri duten Trantsizio Energetikoaren eta Klima Aldaketaren legea, edota onartze bidean den Energia Berriztagarrien Lurralde Plan Sektoriala, EAE mailan. 4/2022 Foru Legea, Martxoaren 22koa, Klima-Aldaketari eta Energia Trantsizioari Buruzkoa, Nafarroan. Loi Relative à l’Accélération de la Production d´Energies Renouvables, Ipar Euskal Herrian.

Momentu honetan onartzear den EAEko Lurralde Plan Sektorialaren onarpena gelditu dezatela exijitzeari garrantzitsu deritzogu, horrek berriztagarrien zabalpen masiboa eman ahal izateko baldintzak sortzea baitu helburu. Argi esan beharra dago estrategia honek ez duela bizi dugun urgentzia ekologikoa gainditzea helburu, gutxi batzuen interes ekonomikoak defendatzea baizik.

• Larrialdi ekologikoaren aurrean natur baliabideen suntsiketa sistematikoa salatzea. Gero eta nabarmenagoak dira azken hamarkadetan ematen ari den naturguneen suntsiketa sistematikoaren ondorio ekologiko eta sozialak. Zer esanik ez suntsiketa honek duen eragin zuzena elikagaien ekoizpenean, lurrak industrializatzean elikagaiak ekoizten jarraitu ahal izateko aukera galtzen baita lur hauetan. Bizi dugun urgentzia ekologikoaren aurrean beharrezko neurriak hartzeari ezinbesteko deritzogu. 9 muga biofisikoetatik 6 gainditu ditugula jakinda, eta egun ezagutzen dugun egonkortasun ekologikoa zalantzan izanik, natur ingurunearekin harremantzeko modua oinarritik aldatzearen beharra aldarrikatu nahi dugu. Muga biofisiko horien artean biodibertsitatearen galerari atentzio berezia jartzea merezi duela uste dugu, hau baita gehien gainditu duguna. Guk lurraren defentsarako hautua egin dugu, bizitzaren oinarri dena. Norabide horretan ezinbestekoa da inposatu nahi dizkiguten makro proiektuei ezezko borobila ematea, makro proiekturik ez!!!
• Eredu ekonomikoaren ondorioz bizi dugun hondamendi ekologiko eta soziala salatzea. Gutxi batzuen eskuetan aberastasuna metatzea helburu duen eredu ekonomikoak, kapitalismoak, natur baliabideak modu masiboan ustiatzea eragin du. Honek ondorio ekologiko eta sozial oso larriak ekarri ditu, munduko biztanleriaren zati handi bat pobrezia egoeran izatetik, inoiz izan den ingurunearen eraldaketa handi eta bizkorrena ezagutzeraino. Horren adierazle da klima larrialdiaren aitzakiapean negozioa egin beste asmorik ez duten enpresa eta instituzioen jokaera. Hazkunde ekonomikoa helburu, klima larrialdian aurkitu dute kapital akumulazioaren dinamikari bultzada garrantzitsu bat eman ahal izateko aukera, herritarron oinarrizko bizi baliabideen pobretzea ematen den bitartea, osasungintza kasu. Gizarte eredu hau oinarritik aldatzea proposatzen dugu, ekosistemen babesa, kontsumoaren eraldaketa eta ongizate soziala lehenesten dituen eredua aldarrikatuz.

Manifestaziora atxiki nahi baduzu, idatzi helbide honetara: komunikazioaehbizirik@gmail.com, edo jarri harremanetan Euskal Herria Bizirik taldeko kide batekin.

LURRAREN DEFENTSAN
EUSKAL HERRIA BIZIRIK