azpiegitura txikitzaileak

Satorralaiak Donostiako metroaren eraikuntza eta hirigintza jarduera basatiak salatu ditu

Alferrikako eta Inposatutako Proiektu Handien aurkako nazioarteko eguna dela-eta egin du salaketa.

0

Marifran Aranjuelo

Satorralaiako kidea. Donostia

Satorralaiak Donostiako Metroaren eraikuntza eta hirigintza jarduera basatiak gaitzesteko aldarrikapen ekintza bat egin zuen joan den ostiralean, abenduak 8, Alferrikako eta Inposatutako Proiektu Handien aurkako nazioarteko eguna dela-eta. Abenduaren 8an hainbat herrialdetan urtero egiten diren ekimenekin bat eginez, obrako hesietan “DONOSTIAKO METROA: ALFERRIKAKO PROIEKTU INPOSATUA. HIRIGINTZA BASATIARI STOP” dioten hainbat pankarta jarri ditugu, zeharo behargabekoa den obra honen inposaketa eta Udal Gobernuak sustatzen dituen jarduera urbanistiko erasokorrak salatzeko.

Metroarekin gertatutakoa zentzugabekeria hutsa izan da. Donostiak dituen neurriak kontuan hartuta, hiriak garraio publikoko sistema on bat eskain dezake azpiegitura-lan ikaragarri hori egin behar izan gabe. Sei urte igaro dira jadanik obrak hasi zirenetik, eta Eusko Jaurlaritzak beste 105 milioi euro gastatuko dituela aurreikusten du 2026ra arte, hasi gabe dauden obraren zati batzuk baloratu gabe –esate baterako San Bartolomeko irteera kanoia. Metroaren eraikuntzak diru-xahuketa itzela eta hiriaren lurpean ezegonkortasun-arazo larriak eragin ditu, hainbat hilabetez tunel-makina etxe azpian duten bizilagun askori eragindako kalteak bezalaxe. Kaotikoak izan dira trafiko-aldaketa etengabeen eta San Martin kalea behin-betiko itxita egotearen ondorioz hartutako erabakiak. Jakina da, bestalde, Donostialdeko Metroak urtean gutxienez 30 milioi euroko finantzaketa publiko iraunkorra beharko duela funtzionatzeko, Dbusen eta Lurraldebusen zerbitzuen murrizketak areagotuz.

Horregatik guztiagatik, Udal Gobernuak metroaren desastrean duen erantzukizuna salatu eta Donostian inposaturiko hirigintza jarduera basatiei aurre egiteko sortzen ari diren borroka guztietan parte hartzeko deia egiten dugu: Manteoko parkea txikituz ezarri nahi duten Basque Culinary Center elitista, San Bartolome muinoan 9 solairuko merkataritza-gunea, Belartza Goian On Line merkataritzako multinazionalentzako poligono logistikoa, Auditz Akularren (Altza) 3.000 etxebizitza berri eraikitzeko proiektu urbanistiko erraldoia berrabiaraztea… Egitasmo horiek denak hirigintza basatienari datxekion politika erasokorraren araberakoak dira.

/ satorralaia

Satorralaia bizilagunen mugimendua
Tlfnoa: 695715510

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

Utzi iruzkina, izen eta abizenez

Azken artikuluak