Hara herriBiltzak joan den larunbatean idatzitako agiria:
Iragarri ginuen bezala, Pirinio Atlantikoetako Departamenduak Euskal Herriko bide departamentaletako seinaletikan lehentasuna eta nagusitasuna euskarari eman arte, euskara bigarren mailako hizkuntza bezala tratatzen duten bide seinaletikako taulak kentzeko auzolanekin segitzen dugu, euskarak ezin duelako itxoin. Arratsalde honetan Garazin beste bi taula kendu ditugu.
1989tik karriketan euskararen erabilpena neurtzen duen Soziolinguistika Klusterrak, joan den maiatzaren 25ean 2021eko ikerketa argitaratu zuen. Ipar Euskal Herrian, 1997tik beranzko joeran segitzen du euskararen karrikako erabilpenak.
Egoera larri honen aintzinean ondokoa adierazten dugu:
Euskal Herrian euskaraz bizitzeko posibilitatea ukan nahi dugu, hau da, gure eguneroko aktibitate guziak euskaraz egiteko posibilitatea ukan nahi dugu.
Hizkuntza batek, bizitzeko, lurralde bat nun herritarrak lehentasunez eta nagusitasunez hizkuntza horretan mintzatzen diren behar du. Beraz, euskara desagertzeko bidean da.
Gauzak hola, euskararen erabilpenaren etorkizuna bermatzeko, urrats berriak egin behar ditugu.
Pirinio Atlantikoetako Departamenduko lehendakariak joan den astean igorri zigun gutunean, herrien izenen ortografia ofiziala aipatzen zuen.
Bada Herriko Etxeei, besteak beste, urrats berri zehatz hauek egitea eskatzen diegu:
- Herrien euskal izena ofizializatzea. Horren egiteko prozedura, https://www.collectivites-locales.gouv.fr/institutions/le-changement-de-nom-dune-commune internet gunean da.
- Ipar Euskal Herriko bideetan, herrien sarreretan, herrien izenaren ahozkera euskaraz eta frantsesez berdina edo berdintsua delarik, bakarrik euskarazko idazkeraren taula uztea, eta ahozkera edota izena ezberdinak direlarik, frantsesezkoa atxiki nahi baldin bada, gainean euskarazkoa eta azpian frantsesezkoa ezartzea.
- Herriaren izena ahozkoan eta idatzizkoan erabiltzerakoan, lehenik eta nagusiki euskarazko izena erabiltzea.
2022ko azaroaren 5ean
herriBiltza
