Euskalkiak

Berbategia.eus aurrera doa eta 11 hiztegi eta 46.000 erregistro gehitu dira

Hasieran genuen helburu bera bultzatzen jarraitzen dugu: euskalkien altxorra jagotea eta herritarrei zein ikertzaileei tresna eraginkor bat ematea.

0

Patxi Alaña

Gizarte eragilea. iBerba Euskara Zerbitzuak. Deustu

Pasa den ekainean www.berbategia.eus webgunearen aurkezpena egin genuen. Euskalkien Lagunak lantaldeak eta Iberba Euskera Zerbitzuak bultzatzen dute eta, bertan, herrietan hainbat ikertzailek urte luzetan jaso izan dituzten berbak, esaerak, etab. biltzen ari gara, hau da, euskalkien aberastasuna.

2023ko ekainera arte, 23 hiztegi igo genituen eta, hortik aurrera, lanean jarraitu dugu eta 11 hiztegi berri gehitu ditugu. Guztira, 34 hiztegi eta 110.000 erregistro baino gehiago daude orain, zeinetan 46.000 baino gehiago berriak diren.

Gehitu ditugun hiztegi berriak Iñaki Gamindek egindako Bilbo, Lezama, Derio, Gatika, Mungia, Abadiño (Mila Salterainekin batera egindakoa) eta Erandioko hiztegiak, Toribio Etxebarriak, Serafin Basaurik eta Asier Sarasuak egindako Eibarko Euskara (udalaren webgunearekin loturaren bidez egina) eta, azkenik, Aitor Aranak egindako Burgos, Errioxa eta Oskako hiztegiak ditugu. Gainera, esan dezakegu Aranaren hiztegiak oso bitxiak direla, Euskal Herritik kanpoko inguruko herrialdeetan euskaraz geratu diren hitzak batzen dituelako.

Berbategia.eus-en hasieran genuen helburu bera bultzatzen jarraitzen dugu: euskalkien altxorra jagotea eta herritarrei zein ikertzaileei tresna eraginkor bat ematea gurea hobeto ezagutzeko, erabiltzeko eta ez galtzeko

Azkenik, bilaketak modu askotara egin daitezke: hitzaren arabera, euskalkiaren arabera, hiztegiaren arabera eta, agian bereziena, multzo edo familiaren arabera. Beste hiztegi gehienek eskaintzen ez duten bilaketa mota bat da eta horri esker, adibidez, “Gorputza.Burua” aukeratuz gero, buruari dagozkion berba guztiak ikusteko aukera dugu. Aukera hau euskera lantzeko eta ikasteko interesgarria da.

Informazio gehiago: 944 00 11 33  

saioa@iberba.eus

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

Utzi iruzkina, izen eta abizenez

Azken artikuluak