Nora nindoan jakin gabe heldu nintzen iaz Independentea.eus-ek Elosuko auzoan antolatutako baraualdira. Nola izan duzu honen berri?, galdetu zidaten bertan aurkitu nituen baraugileek, eta, konturatu nintzenez, neu nintzen bakarra independentea.eus irakurtzeko ohiturarik ez zuena. Egia esan, Eneko Landabururen bitartez izan nuen baraualdi honen berri, eta euskaraz zela jakiteak bereziki animatu ninduen. Aurretik eginak nituen baraualdiak, bai Zuhaizpen, bai Turtziozen (Sumendik uda partean alokatzen zuen atseden etxean), bai Madroñosen eta baita lagun taldean bilduta Burgoseko Oña herrian ere.
Oraingo honek ikutu berezia zuen, etxetik hurbil eta euskaraz eta gainera autogestionatua, horrexek animatu ninduen batik bat. Honek zekarren beste onuretako bat prezioa ere bazen; astebete 175€ zen. Gaur egun Zuhaizpen baraualdia esperimentatzea 1.400€ inguru dela esaten didate; beraz, dena zuen alde Elosuko proposamenak. Egia esateko, Zuhaizpen eskaintzen dituzten babesa eta zaintza apartekoak direla azpimarratu nahiko nuke; Karmelo eta Amelia ere ezagunak ditut eta haien profesionaltasuna eskertzekoa da. Bestaldetik, Sumendik aurten Etxaurin errepikatuko duela jakin dut, Eneko berriz etorriko dela Argentinatik eta han ere gure buruak zaintzeko Osasun Eskola izango dela, baraua esperimentatzea barne.
Atseden etxe horiek eskaintzen duten aukera benetan eskertzekoa da, osasunari lehentasuna ematen dioten planteamenduak hurbiltzen dizkigute eta geure buruak hobeto ezagutzeko aukerak eskaini. Orain arte bizi izan ditudan baraualdi esperientzietan alde inportantea izan dute beti inguruko pertsonekin izandako harremanek eta Elosun 2023an bizi izandakoa apartekoa izan zen. Gune Irekian (Open Space) erabiltzen diren estrategiak ardatz hartuta, barauleen arteko harremanak ondo baino hobeto antolatuak eta bideratuak izan ziren. Azken balorazioetan agertuko zen bezala, batzuetan lan gehiegi hartzen genituen, baina hori norbere esku zegoen, egia esanda.
Gorputza garbitzen doan neurrian autofagia prozesuak ematen dira garbiketa martxan dagoen bitartean, eta emozioak, ahuldadea, sosegurik eza, hauskortasuna eta antzerakoak sentituko dituela eta onartu eta txalotzeko prest egon behar duela badaki baraugileak
Gure artean Angel Bidauzarraga zegoen, medikua, higienismoaren ezagutza sakona duena eta prest zegoena agertzen ziren galderei edo jakinahiei erantzuteko. Kontutan hartu behar, bera ere barauan murgilduta egonik, dedikazioa mugatua zuela. Inoiz baraualdi luzea egin duenak badaki gorputzak erreakzio ezberdinak, sarritan ezerosoak izango dituela eta horretarako prestatuta egon behar dela. Gorputza garbitzen doan neurrian autofagia prozesuak ematen dira garbiketa martxan dagoen bitartean eta emozioak, ahuldadea, sosegurik eza, hauskortasuna eta antzerakoak sentituko dituela eta onartu eta txalotzeko prest egon behar duela badaki baraugileak, hori sentitzen duen bitartean gorputza garbitzen ari delako.
Gorputzak erregulatzeko duen jokaera mugimendu naturala eta unibertsala da; gure barrua aspirazio horretan bizi da, horregatik dugu hain beharrezko atsedena eta BARAUALDIA hizki larriz idatzitako atsedena suertatzen da.
Aurten berriz ere proposatzen den baraualdiak, iazkoak bezala, ez digu eskatuko jan gabe egotea bakarrik; barau teknologikoa ere izan nahi du, hots, ez mugikorrik ezta ordenagailurik ere. Gehienontzat, guztiontzat ez bada, mugikorrik gabe funtzionatzeak sekulako aldaketa suposatzen du, baina baraualdiak hori izan nahi du ariketa eraldakor, gure bizitzetan edo uda honetan gutxienez.
Hain aberasgarria izan zen iazko baraualdiaren bizipena, non aurtengoan jende gehiago apuntatuko dela pentsatzen dugun, baina tokiak, Elosuko aterpetxeak, 40 lagunentzako lekua eskaintzen du gehienez. Beraz, proposamena gustukoa baduzue, eman izena lehenbailehen aurrez prestatu beharrekoak errazteko.
IZEN-EMATEA
• 2024 Barau Astea •
Uztailak 19-25 Elosu
Informazio gehiago:
Ze ona, Alberto, eta zorionak aurtengoa bideratzeagatik. Eta bai, Zuhaizpe, Bizkarra, Landaburu eta haiengandik ez balitz, ez ginateke baraualdia antolatzen arituko. Beraiei zor diegu barauaren ezagutza eta baraualdiaren eredua. Elosun egiten duguna, haiek irakatsitakoa zabaldu, eredu autoeratuan eta euskaraz, ez dagoelako besterik…